×

Кошничка

Вашата кошничка е празна.




Започнете со купување
Бушава азбука

Бушава азбука

Горан Стефановски, Душан Петричиќ


Издавач: ИД-КОНЦЕПТ КОНСАЛТИНГ И ДИЗАЈН (Чудна Шума)
Автор: Горан Стефановски Душан Петричиќ
ISBN: 9786084938309
Жанр: Едукативни изданија
Провери достапност во продавниците
Достапност во продавниците
Книжарница ТРИ ГТЦ Нема на залиха
Книжарница ТРИ Дебар Маало Нема на залиха
Книжарница ТРИ Ист Гејт Нема на залиха
Книжарница ТРИ Веро Центар Нема на залиха
720 ден.

Поминаа повеќе од 35 години откако беше создадена култната ТВ-серија за деца, а по неа и сликовницата „Бушава азбука“ на Горан Стефановски, со илустрации на Душан Петричиќ.

Со „бушавите букви“ растеа генерации и генерации, учејќи го македонскиот јазик и скапоцените подзаборавени, архаични зборчиња кои се одраз на неповторливата македонска книжевност, култура и традиција.

Конечно, во 2022 година, го доживуваме резиданието на оваа вредна книга, од која сега можат да читаат денешните мали „бушави глави“ и растат денешните, нови генерации, негувајќи го македонското културно наследство.

Горан Стефановски

Горан Стефановски

Горан Стефановски (27.4.1952 – 27.11.2018) е еден од втемелувачите на нашата драмска книжевност и столб на македонскиот современ театар.

Роден е во Битола. Татко му Мирко бил театарски режисер, а мајка му Нада била актерка во Народниот театар, па голем дел од своето детство Горан поминал во театрите. Завршил студии по англиски јазик и книжевност на Филолошкиот факултет во Скопје. Дипломирал во 1974 г., како најдобар студент во генерацијата. Студирал и драматургија на Факултетот за драмски уметности во Белград (1972-1973). Од 1975 до 1977 г. бил на постдипломски книжевни студии на Филолошкиот факултет во Белград. Во 1979 г. ja одбранил магистерската теза „Сценските напатствија како основа на драматургијата на Семјуел Бекет“.

Во периодот 1974-1978 работел како драматург во Драмската редакција на ТВ Скопје (на ТВ-сценарија, уредување и адаптација на голем број драми, во продукција и постпродукција). Од 1978 до 1986 г. бил асистент по англиска книжевност на Филолошкиот факултет во Скопје (англиска книжевност со посебен акцент на Шекспир и англиската драма). Од 1986 до 1998 г. бил редовен професор по драматургија на Факултетот за драмски уметности во Скопје (креативно пишување и драмски теории и модели). Во летниот семестар во 1990 г. работел на Универзитетот Браун во Провиденс, Род Ајленд, САД, со Фулбрајтова стипендија за истакнат уметник. Во периодот 1998-2000 бил гостин професор по драматургија на Драмскиот институт во Стокхолм, Шведска, а од 2000 година бил хонорарен професор по драматургија на Универзитетот во Кент и на Колеџот Крајст черч во Кентербери, Велика Британија.

Во литературата дебитирал со ТВ-играта „Клинч“ во 1974 г. Истата година се појавува и драмата „Јане Задрогаз“. По неа следувале радиодрамата „Чиракот Шекспир“ во 1975, ТВ-драмата „Сослушувањето на железничарот“ во 1976, ТВ-филмот „Томе од бензинската пумпа“ во 1978, ТВ-серијата „Наши години“ во 1979 година. Голема популарност стекнал со драмата „Диво месо“, за првпат изведена на сцената на Драмскиот театар во Скопје, во режија на Слободан Унковски, кон крајот на декември 1979 година.

По „Диво месо“ следувале „Лет во место“ (театарска фреска, 1981), „Хај-Фај“ (театарска мутација, 1982), „Дупло дно“ (театарска пасија во три става со кода, 1983), „Бушава азбука“ (ТВ-серија во 31 епизода, 1985), „Тетовирани души“ (театарска пиеса, 1985), „Црна дупка“ (театарска пиеса, 1988), „Лонг плеј“ (рокенрол мистерија, 1988), „Кула вавилонска“ (театарска пиеса, 1990), „Гоце“ (едночинка, 1991), „Чернодрински се враќа дома“ (драма, 1991), „Сараево“ (приказни од еден град, драма, 1993), „Старецот со камен околу вратот“ (едночинка, 1994), „Оазата на Мира“ (ТВ-драма, 1994), „Сега му е мајката“ (фарса, 1995), „Баханалии“ (драма, 1996), „Екс-ју“ (едночинка, 1996), „Казабалка“ (драма, 1998), „Приказни од еден град“ (1999), „Хотел Европа“ (сценарио за мултимедијален проект, 2000), „Конзервирани импресии“ (кратки раскази, 2004), „Демонот од Дебар Маало“ (драма, 2006), „Огнени јазици“ (драма, 2013) итн. Автор е и на либретата „Травијата“ (1989), „Зодијак“ (1990), „Чернодрински“ (1991).

Горан Стефановски е изведуван на сите македонски сцени, преку сите некогашни југословенски културни центри, сè до големите театарски центри во светот: Париз, Белград, Будимпешта, Лондон, Пазарџик, Софија, Варна, Загреб, Москва, во повеќе градови во САД, во Брезно во Словачка, во Лоѓ во Полска, Антверпен во Белгија, Стокхолм итн. За своите драми шестпати ја има добиено наградата „Војдан Чернодрински“, а двапати се закитил со „Стериина награда“. Ги има добиено и наградите „Стале Попов“, „11 Октомври“, а во 2021 г. постхумно му е доделен Орден за заслуги на Македонија.

Горан Стефановски беше член на Македонскиот ПЕН-центар, на Друштвото на писатели на Македонија од 1979 година, а од 2003 година и член на МАНУ надвор од работниот состав.

Стефановски беше и високо ценет есеист, јавен интелектуалец и предавач. Објавил трудови со кои настапувал на голем број конференции и одржал работилници низ цела Европа. Неговото последно јавно предавање беше на Меѓународната федерација за театарски истражувања на Светскиот конгрес во Белград, во јули 2018 година, како пленарен предавач. Неговото последно појавување во јавноста беше да го прими почесниот докторат од Националната академија за театарска и филмска уметност „Борис Сарафов“ во Софија, Бугарија.

Види повеќе

Можеби ќе ве интересира




Веб страницата користи колачиња за да ви овозможиме најдобро можно корисничко искуство. Со продолжување на користењето на нашата интернет страница ја прифаќате употребата на колачиња (cookies).

Се согласувам