Карстен Хен
Карстен Себастијан Хен е современ германски раскажувач, новинар и познавач на вината, автор на дваесетина бестселери. Роден е на 29 октомври 1973 година, во Хирт, близу Келн. Интересен податок за него е дека е министер за гозби, пиење и сите други форми на кулинарско задоволство на микронацијата Ладонија.
Средното образование го завршил во гимназијата „Алберт Швајцер“ во 1993 година, а потоа студирал на Универзитетот во Келн. По завршувањето на магистерските студии по етнологија, социологија и географија, во 1997 година се запишал на студии по етнологија и лозарство во Аделаида, Австралија. До 2008 година бил вработен во управата на својот роден град Хирт, а оттогаш му се посветил на пишувањето и својата новинарска кариера.
Како слободен вински новинар, Хен пишува за домашни и меѓународни списанија и член е на жирија за неколку награди за вино. Од 2013 година работи како ресторански критичар за весникот „Келнер штат-анцајгер“. Од 2018 г. е главен уредник на винското списание „Винум“.
Карстен Хен пишува раскази и романи, главно криминалистички и на тема вино и кујна. Во 1996 година бил најмладиот автор застапен во антологијата „Јунгер Вестен“, која дава преглед на современата германска литература на Северна Рајна-Вестфалија. Во 2002 г. го издава „Ин вино веритас“, првиот том од „кулинарско-винофилски“ криминалистички циклус за главниот готвач Јулиус Ајхендорф од долинатата Ар, кој работи и како детектив. До 2014 г. седумте тома од овој негов серијал се објавени и како аудиокниги. Во 2007 објавува збирка од 23 кратки криминално-кулинарски приказни, а во 2008 година го започнува вториот криминалистички серијал „Смрт од тартуфи“.
По објавувањето во 2020 година, „Човекот кој шета книги“ е постојано меѓу најпродаваните романи во Европа. Тој допрва го освојува светот со својата книжевна постапка и универзалната порака за вистинските човечки вредности.
