Сосуке Нацукава
Сосуке Нацукава е јапонски лекар и писател кој постигна голем успех уште со своето појавување на литературната сцена. За своите дела има добиено неколку престижни книжевни награди, а преведени се на триесетина јазици.
Сосуке Нацукава е роден во 1979 година, во префектурата Осака. Завршил медицина на Универзитетот „Шиншу“ и работи како лекар во префектурата Нагано, каде што и живее.
Неговиот повеќетомен дебитантски роман „Клиничка слика“ („Kamisama no Karute“) е издаден во 2009 година. Ја добива наградата на „Шогакукан“ за најдобар роман и е втора најпродавана книга таа година. Продаден е во над три милиони примероци и според него е снимен успешен филм.
Вториот роман на Нацукава, „Мачорот кој ги спаси книгите“, е објавен во 2017 година и наидува на уште поголем интерес, па наскоро е преведен на триесетина светски јазици. Универзалните теми, магичниот реализам и улогата на мачката во јапонската култура побудуваат голем интерес и се актуелни книжевни теми и во останатиот дел од светот. Затоа овој бестселер на Нацукава е една од најчитаните и најбараните книги во последните години, препорачувана и од критичарите и од читателите. Освен неодминливите теми за моќта на пријателството и охрабрувањето да се излезе од осаменоста, оваа приказна има волшебно дејство врз сите вљубеници во книгите, за кои тие се многу повеќе од обични зборови испечатени на хартија. Нацукава восхитува со своите богати литературни познавања, но и со смелоста отворено да го каже она од кое не страдаат само книгите туку и загрозениот духовен свет во современото општество.
Следејќи го примерот на големите современи јапонски автори, Нацукава со сопствената автентичност остава свој белег во современата јапонска литература.
