| Достапност во продавниците | |
|---|---|
| Книжарница ТРИ Веро Центар | Достапно |
| Книжарница ТРИ ГТЦ | Достапно |
| Книжарница ТРИ Дебар Маало | Достапно |
Трчањето ме учи е збирка текстови инспирирани и посветени на големата пасија на повеќекратниот државен шампион во трчање Кокан Ајановски. Тој ѝ е добро познат на јавноста по своите достигнувања на тркачките патеки – над 20 пати државен првак на Македонија во повеќе атлетски дисциплини – но и надвор од нив, како еден од амбасадорите на спортот кој секојдневно го популаризира и ја шири страста наречена трчање.
Овие кратки бисери се излезени од секојдневието на човекот за кого трчањето е многу повеќе од спорт – во трчањето Кокан ја пронаоѓа големата смисла на животот. Трчањето му е и животен учител чии лекции важат како на патеките така и надвор од нив. Сакајќи да сподели со вас дел од наученото, тој своите мали и големи откровенија ги пренесува на хартија, во текст полн со топлина и емоција.
Трчањето ме учи е книга полна со инспирација, мудрост, поуки, благодарност, љубов, и една посебна сила што постојано нè движи напред и нè поттикнува да истрчаме уште еден километар, да направиме уште еден напор – за да станеме подобри од она што веќе сме.
Кокан Ајановски (1982) е основач, инструктор и промотор во Школата за трчање Nike (NRC – Nike + Run Club Skopje), маратонец, повеќе од 20 пати државен првак на Македонија во повеќе атлетски дисциплини (полумаратон, 10 000 м, 5 000 м, планинско и крос-кантри трчање). Има повеќе од 30 настапи за атлетската репрезентација на Македонија. Најзначајни интернационални успеси има остварено на балканските првенства (бронзен медал поединечно во маратон и бронзен медал екипно во крос-кантри натпреварување), а има учествувано и на многу меѓународни натпреварувања (европски олимписки игри, светско првенство во полумаратон, европски првенства во крос-кантри, светски и европски првенства во планинско трчање).
Последните десетина години активно го промовира рекреативното и професионалното трчање во Скопје и Македонија преку својата школа за трчање. Таа денес има над 200 членови на кои им овозможува бесплатни групни тренинзи и многу други активности (патувања, едукации, дружења, забави). Во неа се добредојдени сите љубители на рекреативното трчање.
Веб страницата користи колачиња за да ви овозможиме најдобро можно корисничко искуство. Со продолжување на користењето на нашата интернет страница ја прифаќате употребата на колачиња (cookies).
Се согласувам