| Достапност во продавниците | |
|---|---|
| Книжарница ТРИ ГТЦ | Достапно |
| Книжарница ТРИ Веро Центар | Достапно |
| Книжарница ТРИ Дебар Маало | Достапно |
Тројца блиски другари одат на технофестивал во тунелите под Брисел. Лазар е писател среде авторска блокада и рецепционер во луксузен хотел. Лусија е фотографка опседната со својот мачор. Даниел е диџеј чија кариера тукушто започнува.
Во текот на ноќта, Даниел слуша дотогаш нечуена фреквенција што сака да ја улови за следните проекти, па тројцата влегуваат во тунелот низ ’рѓосаната врата. Излегувањето оттаму ќе ги соочи со прашањето: кој сум јас? Нивните документи повеќе не важат. Во нивните станови живеат други луѓе. Одеднаш, никој не се сеќава дека некогаш постоеле. Потрагата по тоа што точно се случува ќе ги принуди да се соочат со личните стравови, трауми и неостварени соништа кои долго време биле потиснувани.
„Како гори пепелта“ е урбан роман во кој откриваме друг Брисел зад европските институции и костумираните службеници, како живописна палета од различни култури, јазици и животни приказни кои се лепат по неговите улици. Брисел во овој роман е град на гласна музика и уште погласна осаменост.
Меѓу неизвесните ноќи во запоседнати простори, техноклубови, подиуми за играње и сивилото на градот, ова е вистинска одисеја за пријателството и за потрагата по сопственото место во светот.
Милош Димковски е современ македонски писател и новинар. Роден е на 7.10.1991 година, во Куманово. На пошироката читачка публика ѝ е познат под псевдонимот Евгениј Хоуп.
Дипломирал на Филолошкиот факултет „Блаже Конески“ при Универзитетот „Св. Кирил и Методиј“ во Скопје, на отсекот Општа и компаративна книжевност. Работел како дописник во Културната и во Забавната редакција на „Утрински весник“, како и за неколку портали.
Своите први две дела Димковски ги објави под псевдонимот Евгениј Хоуп. Во светот на книжевноста влезе со романот „Парада на марионетките“, објавен во 2011 година. Во 2017 година го објави „Годините кога научив да летам“, роман за личното искуство од поминатите 30.000 километри со автостоп низ светот. Романот предизвика голем интерес и токму според него Димковски е препознатлив на македонската книжевна сцена. Ова е негов трет роман и прв што го објавува под своето вистинско име.
Види повеќеВеб страницата користи колачиња за да ви овозможиме најдобро можно корисничко искуство. Со продолжување на користењето на нашата интернет страница ја прифаќате употребата на колачиња (cookies).
Се согласувам
